Bangon

Bangon kaibigan, tayo ay aahon

Sa lalim ng balon, umabot man sa pusod

Ng dagat na asul, puti, dilaw, pula

Ang apoy sa puso'y hindi maaapula.

Bangon kapatid, dusa'y limutin

Punasan ang luha sa mukhang madungis

Itayo ang mga paang nakakapit sa putik

Ng sinaunang delubyong ating nagapi.

Bangon

Hiling ko sa iyo

Payapang buhay

at pag-asa

siyang matanaw

Kasama ng ibong 

lumilipad

naglalakbay

Bughaw na langit

siya nawang sumaatin.