Pagkikita

Gregorio Agno Patulayin
( 9 Mayo 1926 - 12 Pebrero 2015)

Nakikita kita sa bawat punong nakatayo,

dahon ay iba-iba

gaya ng mga nakagawian mo sa buhay na nagdaan,

katangi-tangi, makulay, maganda.

Nakikita kita sa bawat kumpas ng maestrong

nakatayo sa harap ng orkestra,

isinasabuhay ang mga notang

sa papel ay tiniyagang isulat,

nilapatan ng musikang naglalarawan ng kahapong

kaysaya, kayganda, kaaya-aya.

Nakikita kita sa bawat gurong

nagsusulat sa pisara,

larawan mong guhit ang kanilang ginagaya.

At ako, nakaupo sa isang sulok

mataimtim na nakikinig sa iyong kasaysayang

masalimuot

datapwa't nakakawili, nakakagana.

Nakikita kita sa sulok ng altar,

tahimik na nakatayong kasama

ng paring minamahal.

Oscha ang iyong tangan,

mga katagang "Katawan ni Kristo" sa sambayana'y

naukit, tumalima, tumimo.

Malabo pa rin hanggang ngayon

Pero nakikita kita kasama ng Maykapal

masayang naglalaad sa paraisong

sa iyo'y pinangako Niya.

Mula diyan sa itaas,

ako'y nakikita mo,

ang iyong apo,

pinakamamahal na apo,

tumatangis, nagdurusam lumuluha.

Mamay ko,

Mamay ko,

sa muling pagkikita'y yakapin mo ako,

ang iyong apo,

pinakamamahal na apo,

sa iyo'y nagtatangi,

nagkakalinga...

Sa iyo'y

nagmamahal.